11. KA HAKSAT MAHMAH HUN LAI IN HONG HUH KA MAK GILH THEI LO MI PAWLKHAT

Evangel Bible College, Yangon ah  Lai Siangtho sang kakah lai in kum 5 sung sumlehpaai tawh hong panpih Pa Ngo Khup tenupa ( Khuasak khuami ) leh ka Uu Thawng Vai Nang tungah ka lung adam mahmah hi.Ka lungdam na hih ka Laibu sungpan ka pulak hi.

photo

Galkap kumpi in biakna hangin matding in hongdelh in India ah katai a, ka Zi leh kata te Annek dingin Rev.Dr.Chin Do Kham in Ks.25.000 hong piaksak hi. TuaHunpen 1994 kum hi a, buhtang ipkhat Ks.400 a mat laitak a hihi. TuHun sum in tuatding cileng tamlua peuhmah ding hi. Ka lungdam na kigen thei lo hi. Tuaban ah Delhi, India ah galtai in ka om hun 1998 kum in zong,$300 mah honghuh beh lai hi. Kalawm Rev.Dr.Chin Do Kham tungah nakpi tak in ka lungdam-na hih ka autobiography sungah ka ciamteh hi.

Rev.Do Kham

Tuakhit teh Rev.Dr.Chin Khua Khai tungah ka lungdam na zong hih ka Laibu sungpan      kapualak  hi. Kawl galkap kumpi in matdingin hong delh delh ahihman in Kawlgam sungah ka om theinonkei a, India ah katai hi. India ah ka-om hongsawt tak teh Kawlgam ah ciah kiknuam kahih manin Tedim Thukhen Zum ( Court ) pan ka Case ka mansiang nading kahahkat hi. Tualeh Tedim Thukhen mangpi pa ( Kawl te ) in Sum Ks.250,000 hongngen hi. A man hongcih na ah hih Sum pen kei adingbek hilo hi. (.                  ) leh Police te tawh zongin kahawm kulding hi hongci hi. Tuateng zong  alungkim dinguh kisam hi hong ci hi.

Tua Sum dingpen Rev.Dr.Tin Maung Tun in hong leitawi hi. Ka lohkik nading neilo kahihman in kabuai pha mahmah a, kalung a kham pha mahmah hi. TuaHunlai tak-in Rev.Dr.Chin Khaw Khai America pan hongciah in Kalaymyo ah ka kimu uh hi. Ka kimuhphet un aman, Oh Sya Kap, Namgh Kawlgam ah omthei ta maw hong ci hi. Om theitamah ing. Ahizong in  ka Case kaman nading in Ks.250,000 kaleitawi sumteng kalohkik zo naikei a, kalung akham mahmah hi ka ci hi. Tualeh Rev.Dr.Chin Khua Khai in tu-ni akipan tua naleibat sum teng ken Tavuan honglak sakning  hongci ziau hi. Tua Ni pen leitungah ka lungdam lianpen NiKhat hiding in ka um hi.

Rev.Dr.Chin Khua Khai photo

Hongcihmah bangin aman Ks.200,000 hong huh-in Rev.Dr.Kham Khan Khai ( Rev.Dr.Khaipi Nahnuai khuami ) in Ks.40,000 honghuh hi. Tuaban ah Rev.Dr.Chin Khaw Khai hong gensak na mah tawh Pa Lian Kam te kiangpan in zong Ks.90, 000 huhna kangah beh lai-a, ka leibatloh kiknading, aval dong in kangah hi. Hih kaleibat lianpi, sun leh Zan-in ka ihmuthei lohteng Rev.Dr.Chin Khaw Khai hong vaihawm pih na tawh ka Vanh hong zang in kaleibat napan ka suakta hiau hi. Rev.Dr.Kham Khan Khai tungah Ahizong in Pa Lian Kam te tungah Ahizong in ka lungdam na hih kalaibu sungpan ka pulak hi.

Tuakhitteh India ah ka om sung-in ka Zi kata te Annek tuidawn ding aHun aHun in honghuh ka sanggamnu, ka uu Mankok tungah zong ka lungdamna hih ka Laibu pan ka pulak hi. Amah om kei leh ka Zi kata te Annek tuidawn a buai Hun tam pha mahmah ding uh hi. Hih a nuai a maan pen ka O Mankok maan a hihi.

O Mankok Photo

Tuaban ah ka uu Cing Khan Huai te nupa in zong a nuntak Hun sung in ka Annek ka tuidawn dinguh tampi tak mah honghuh uh a, ka lungdam na, hih ka Laibu sungpan ka pulak hi.

India ah biakna hangin ka galtailai tak in sumlehpaai tawh honghuh zel, Pu En Za Pum te innkuan tung, ka Uu.Thang Za Dal leh ka Uu Kip Khaw Lian tung, Pa Zam Cin Thang  ( Pa Thangpui ) tungah  zong ka lungdam na hih ka Laibu sungpan in ka pulak hi. Tua ban ah Delhi ah ka haksat mahmah laitak in hong huh ka Pu Son Thian Khai ( USA ) tung leh Pa Mung Pui ( Voklaak, Tamu, USA ) tungah zong ka lungdam na Hih ka Laibu sung pan ka pulak hi.

Galtai in Aizawl katunciang nasiatak in hong kem in zinhongtung sak Rev.Lal Rara te innkuan, Aizawl Police Officer Pa.Thang Pian Khup ( Tungzang khuami ) Pi Dal-i ( Hakha mi ) te tungah ka lungdam na hih ka Laibu sungpan ka pulak hi.

Rev.Zara te nupa leh Pian photos

Malaysia ah kum 3 leh kumlang ka om hi. TuaHunsung-in Kawlgam sungpan ka Laibu gelh, mi-i deih mahmah VAN GAM TUN NA DING KAL 4 cih ka Laibu ka bawlkik nuam a, Sum ka neih kei hi. Tualaitak in Rev.Vai Pum tapa Thawngpui ( Sweden a om ) tawh contact kangah kha hi. Thawngpui  pen khan-gual khat, kahih lo-uh hang Mai Shu ah ka kithuah ngeikha uh a ka ki maigap mahmah uh hi.

Amakiang ah ka Laibu bawlnop thu kagen a, huhna sum kanget leh aman, Malaysum RM1,000 hongkhak in hong lohkik nonken hongci mawk hi. Keizong a tuasum kangah teh ka Laibu Bu 1000 Printing press ah ka order pah hi. Bu 1000 ciang Malasum in RM4,000 ( Tul li ) a tung a, kei zong a tua RM 1,000 Thawngpui hongkhak tengpen deposit in ka piapah hi. Ka Laibu Malaysia, America, Sweden, Japan ah ka zuak sak kawikawi a, a tua Sum tawh ka Zi le ka tanu HauMek Kawlgam panin Malaysia ah ka sam zo pah hi. Thawngpui ( Khuasak khuami ) tungah ka lungdam na hih ka Laibu pan ka pulak a, kanuam mahmah hi.

Photo Vangam piana Kal 4

Tuaban ah Malaysia ah ka om sungin Pa Kamno leh Nu Huaipui te nupa ( Khuasak khuami ) in RM 3,000 val bang Khazih mintawh, lovegift hongpia uh a, kalung uh adam mahmah hi. Ka lungdam na hih kalaibu pan ka pulak hi. Tuaban ah Malaysia ka om sungin Pa Sing Mun Vai te innkuan in lovegift RM 400 hong pia uh a, ka lung adam mahmah hi. Hih ka Laibu sungpan in ka lungdam na ka pulak hi. Tua ban ah Pa Hau Kawi ( Lophei khuami ) in zong Malaysia ah ka om lai-in USA pan $100 hong huh a ka nuam mahmah hi. Ka lungdam na Hih ka Laibu pan ka pulak hi.

America ka tun ciangin Pa Khaipui ( Limkhai khuami ) in IPAD, Memory 128 te, Apple ( brand ) khat $968 tawh hong leisak in hong piakhong hi. A tua IPAD kaneih man-in tua IPAD sungpan pilna tampi tak kangah kha a, ka lung adam pha mahmah hi. Ka lungdam na hih ka Laibu pan ka pulak hi.

MARYLAND  Khaipi photo

America ah bel Lovegift hongpia a mimal in lungdam kohding cileng akikoh zo ding hilo hi. Tamluamai hi. Pasian in thupha hongthuk sak kikkiim nading-in nisim phial-in thu kanget pih den hi.

Tuaban ah 1987 kum-in Tamu ah Pasian naa kasep lai-in Rev.Dr.Khuppi ( Lawibual, Tedim ) in Bicycle thakset khat hong leisak in hong piakhong hi. Ka lung a nak dam mahmah hi. Hih ka Laibu pan ka lungdam na ka pulak hi.

Tuateh 2003 kum in ka Pasian nasep nading in TAMU pan U.Hla Swe leh Daw Ki Kim te nupa in Motor Cycle a thakset khat, Ks.510,000 tawh hong leisak in hong piakhong hi. Ka lung adam pha mahmah hi. Ka lungdam na Hih ka Laibu pan ka pulak hi.

Motor cycle photo

Ka lungdam kohna ah ka makgil mi 4 leh 5 peuhmah om laiding hi. Pawi thupi khat I bawl ciang lungdam kohna ah magilh lohding a a kilawm khat leh nih, ki makgilh thei hamtang hi. Kong makgilh te in nong telsiam nading un Hih ka Laibu pan in kong thuum hi. Ken kong magilh khak zenzen hang Pasian in hong magilh peuhmah lo ding hi. Thupha zong hong thukkik sak teitei ding hi cih zong ka up na a hihi. Nisim phial in ka nuntak sung hong huh khempeuh Pasian in thupha hong thuk kik sak nading thu ka ngen den hi.

Leave a Reply

Your email address will not be published. Required fields are marked *