8.ZOMI AGAPE PAWLPI ( USA ) AH PASTOR KASEP THEI NA

Tu-a, ZCC pawlpi ( ZBCA ) pen 2009 kum in Bowling Green City ah Rev.Zam Suan Mung ( Rev.Mungpi ) makai natawh akiphutkhia Pawlpi a hihi. Akiphuh cil lai-in ZBCA tawh kizom nailo hi. Kum bangzah hiam khat-teh ZBCA tawh hong kizom uh hi. Ka theikhial kei leh 2014 beidong pen Bowling Green khuasung ah Chin Christian Church ( Hakha Pawlpi ), Myanmar Zomi Christian Church, MYanmar AG church cih hiteng thumbek ah ei-mi te biakpiak na nei uh hi. KA YIN Christian dan zong bel themkhat om sam hi. Ei Zomi te bel Rev.Mungpi biakinn bekah atung masasa akikhawm ahihi. Zo leh Zomi RC te bel a mau RC biakinn ah kikhawm uh hi.

2014 kumbei ciangin Myanmar Zomi Christian Church ( Rev.Mungpi makai na pawlpi ) te Upa kitelna hongnei uh hi. Hunsawt mahmah ta ahihman in a MEE tangsim uh, a biakinn sungah zomanlo uh a, Rev.Mungpi innah ciahpih uh hi. Upa te 2 leh Rev.Mungpi- i, mawhpuak na ( Tavuan lak-na ) a hihi.

Tualeh Upa telcing teng amin uh hongpulak uh ciang Pa Kam Lian Thang ( Pa Thangpi ) min hong kihel lo hi. Tuateh mi khempeuh phial- in Lamdang sa uh hi. Mee piakdan pen laidal neu tungah min ki-at ziau hilo in Laidal tungah Upa aki telding khempeuh-i min teng a kigelh dimdem hi-a, tua lakpan mipi-in amaudeih teng ballpen tawh a giit-ngiat uh ban-ah file sungah kepcingding thukhun omsa ahihman in kuamah in maimangsak theilo, mawkbei cihbang om theilo hi.

Pa Kam Lian Thang min Upa dinglak ah akihello teh Meetang a check kik uh leh Pa Kam Lian Thang in Mee 44 ngah a, Upa telcing telak ah a 4 na a hihi. Hi bangin a maanlo in nahongsep uh teh Rev.Mungpi Pawlpi pan Makai, Upa te honkhat a lungkim lo uh a, pawl kikhen nadongin hongpiang ta hi. Tu-a kagen Pa Kam Lian Thang, Mee vailo zong amau sungah buaina tuamtuam zong om thei lai mai dingin ka um hi.

March 2015 kum ciang Rev.Mungpi Pawlpi ( MZCC ) pan anuai a teng hong pusuak uh hi.
1. Pa Thang Khawm Pau te innkuan
2. Pa Kam Lian Thang te innkuan
3. Pa Khenta te innkuan
4. Pa Ngaih Khup te innkuan
5. Pa Kham Thang te innkuan
6. Pa Sial Khup te innkuan
7. Sia Sawm Thang ( A Zi leh a ta te hongtung nai lo )
8. Pa Kimpu te innkuan

Pa Khenta te inn pen, biakinn in kizangh phot hi. Mi 20 kiim bek ki ta hi.

photo

Ahihhang kuamah pawllut cihdan om mel lo hi. Amau teng lo-ngal midang akikhawm beh zong tam lo hi. MAY 2015 kum ka omna lui Apartment ah ka-om laitak in sunKhat Pa Khawnm Pau, Pa Thangpi te mi 5 hiam 6 hiam honghawh uh a, Zomi Agape Church ah Senior Pastor hongsem in ci-in hong zol uh hi.

Ken kadawn kikna-ah Keipen hitheileh Sizang Christian Church khat akipan nuam hi-ing. Tu tadih inbel kuamah hongtung naikei ahiven kaci hi. Tualeh amau In Sizang mi-te hongtun ciang Sizang Pawlpi nadin nop-uh leh din-un la, tu tadih inbel kithuah ni hong ci uh a, tua ni pan tuni dong a kithuahsuak ka hi uh hi.

Pasian lungkim nazong om hin teh. Pawlpi pen hong khang toto in Pa Khenta te inn kita non lo hi. Tuaciang Pa Ngaih Khup te inn ah Nipi Ni biakpiak na ki bawl leuleu hi. Pawlpi pen hong khang toto a hih manin Pa Ngaih Khup te inn zong kita non lo leuleu hi. Tua ciang MangkangbTuiphum biakinn khat ah biakpiak na bawl thei nang ki gen leuleu hi.

Mangkang Tuiphum Pawlpi ten hong pia ziau peuhmah lo In, Kha 3 sung hong test phot uh a, a mau kikhop hunsung, hong kikhawm sak phot, hong en sak phot uh hi. Kha 3 sung thuman tak in ka kikhop khit uh ciang a biakinn uh an room gol mahmah 2 a Free in hong zangh sak uh hi. Room khat pen Ulian teng biakpiak nading hi a, a dang room khat pen Sunday School te zatding a hihi.

Photo

Pasian in, a Pawlpi thupha hong pia in naupang Sunday School kah mi 100 hong val ta a hih manin, Sunday School naupang te a ding ngaisut na tawh United Methodist te biakinn khat kikhawm leuleu hi. United Methodist Pawlpi ten Sunday Ni, kikhop khat ciang $250 hong ngen uh a ki pia den hi. Pasian in a Pawlpi hong phungvuh toto a, a na khempeuh ah kikhang to mai hi.

photo

Photo

toto in Pawlpi nuam mahmah khat hongsuak dihdih mawk hi. Kei zonglah Sizang Pawlpi dinding ut nonlo in Pawlpi mi-te in zong la hong it thei mahmah uh hi. Ka teeknung ka vuai nung in Pasian hong siatvat nakhat hiteh cihzah dong in kangaisut a, Zomi Agape Pawlpi sungah nuam kasak mahmah hi.

Zomi Agape Pawlpi i, kalsuan zia pen
– Movement lam ah Pentecostal movement
tawh kikalsuan a,
– Gupna thu tawh kisai in Evangelical
Upna tawh kikalsuan hi.
– Administration lam ah Tuiphum te-a, alang,
AG te a, alang tawh kikalsuan hi.
Tua zong zanghthei photleng mikhat kia-i
idea tawh kalsuan sang na nuamzaw a,
zongh na muibun zaw lai hi.
– Thum gawm Pasian a pom Pawlpi a hihi ci in
Pawlpi thukhun ( By Law ) ah kikoih hi.

Zomi Agape Pawlpi pen leitung bup-ah a mahkia in a ding Local Pawlpi khat a hihi. Ei-i Pawlpi lui ciat pan pusuak kul lo hi. Bowling Green, USA ah i-teen laisiah Zomi Agape Pawlpi ah Pasian bia-khawm ni cih thu hi lel hi.. Kei bang AG pawlpi pan a puasuak ka hi peuhmah kei hi. Tuiphum te zong Tuiphum Pawlpi pan a pusuak uh hi peuhmah lo hi. Banghanghiam cih leh Zomi Agape Pawlpi pen denomination pi taktak hi lo hi. Ahihhang a lamdan na thukhat ah Pawlpi tuamtuam pan kahih uhhang, Updan sandan leh movements khempeuh hong kibang to diamdiam hi. Pawlpi ( denomination ) min khat tawh i dinciang pawl honglut ding mi honkhat zong hong lut nuam nonlo uh ahih man-in good idea mahmah khat a hihi. Upna maanlo Pawlpi khat-i, Upna peuh a kizuih pih thapaai hi peuhmah lo hi.

AG mikhat in a lunglen nading om peuhmah lo hi. Banghang hiam cih leh AG pawlpi sung ah, Upzia, kalsuan zia khempeuh a kizangh ziahziah a hihi. A dal a khak bangmah om lo hi. Tua mahbang in Tuiphum mikhat ading inzong Tuiphum Pawlpi a lunglen kik nading peuhmah om lo hi. Banghanghiam cih leh tuhun khangthak te adingin Tuiphum leh AG pen a ki lamdan na om non lo mawk uh hi. Tuaban ah Gupna LAI GIL ki nakgen mahmah ahihman in Pawlpi mi khempeuh phial-in HEHPIH NA THU pom thei ta uh hi. Laam-na Dian-na a pom thei lo EBC Pawlpi mi pawlkhat pen EBC Pawlpi hong kiphuh ciang EBC Pawlpi ah hong paisan uh a, vai hongsiang pah hi.
Tulaitak Pawlpi mi inn 100 kiim teng pen Upzai, kalsuan nopzia kituak pha mahmah in nuam kisa mahmah kiim hi.

Pasian in Zomi Agape Pawlpi pen thupha tampi hongpiak na tawh kizui in Tonzang township Thangkai kual ah gupna thu gen dingin Sia Thang Khan Suum ( Tuithang khuami ) $163 tawh Evangelist in kikhak a, Sia Thang Khan Thawn ( Ngennung khuami ) zong leitung bup Zomi om na khempeuh ah gupna thu gen dingin $163 mah tawh Evangelist in ki khahkhia hi. Tua banah Rev.Lian Za Nang
( Suangpi khuami ) zong Kawlgam bup ah gupna thu gen dingin $163 mah tawh ki khahkhia hi.

Evangelists teng Photos

Pastor te in Pasian adingleh Pawlpi ading a hahkat theizah in hahkat uh a Upa teng zong a hai paupau om hetlo uh hi. A ngaisut na te uh Picing thei mahmah uh hi. Tua in Pawlpi kip sak mahmah hi. Pawlpi mi 95% in 1/10 maan tak-in pia uh hi. Pawlpi sungah Pilna ( Skills ) neih tam mahmah uh a, Pawlpi a dingin kizangh thei pha mahmah uh hi.

Zomi Agape Pawlpi pen denomination taktak tawh ki kalsuan lo a hih man-in mi tampi tak Zomi Agape Pawlpi ah hong lut uh hi. Banghanghiam cihleh a khaktan Pawlpi lungsim om non lo ta hi. Bowling Green City ah Kawlgam Pawlpi 15 lak ah mi atampen, a khanglo pen, sum pi ahatpen Pawlpi hong suakpah lian hi. Kum 5 sungin Pawlpi mi 350 bang kapha uh-a, inn 100 kiim bang Pasian in hong phungvuh hi.

1/10 pen kum khat in $250,000 val bang ka ngah uh hi. Kawlgam pan hong pai, AG Sia, Tuiphum Sia te in Hun hong zangh ziahziah den uh hi. Gupkhiat na Tintan kum Khat in khatvei nasia tak leh kician tak in ka bawl den uh hi. A kal ah zong gupna thu ka gen lai uh hi. Kum 5 sungin Zomi Agape Biakinn ding a mun Ekah 5 val deuhciang $74,000 tawh kalei uh hi. Tuakhit ciang biakinn lamh ka kipan uh a, Pasian hehpih natawh Dollars Thein 14 man khat kalamh uh hi. Parking lots zong 100 kiim kabawl pah uh hi. Pasian Kha Siangtho in hong ompih ahihman in Pawlpi sungah ki thutuak na om in noplua mahmah mai hi.

ZAC biakinn photo.

Church deacon photo
and department’s photos

Keipen 2011 kum akipan in zunkhum kangah a, kazunkhum hong khauhpai tektek ahihman in 2016 kumbei ciang Pastor pan khawl nading kangen a, Pawlpi Upa ten Appointments paipih dending nagaap nonkei leh Appointment peuhmah hong khawl lel in-la, Senior Pastor zong nagaap nonngei leh Assistant Pastor Sia Sawm Thang in semsak ni-in nangpen nong khawlding piangthei lo hi. Mission Pastor hong sem lai-in hong ci uh a, Tuni dong Mission Pastor asem lai ka hihi ( 2019 ).