9.AMERICA AH PASIAN THUPHA KA SAN ZIA
Pasian in America ah thupha tampi hongpia hi. Ka tapa Dalseen te innkuan in inn hoih mahmah khat $160.000 tawh honglei uh hi. Tua innpen a dung Laam 8 hi-a, a vai laam 7 a hihi. Innsung vanzat ding akisam om ngiatlo in kadeih khempeuh uh Topa in hong leizo sak hi. Mawtaw zong 3 kanei uh a, Dalseen in khat zangh a, ka Mo-nu in khat zangh in ko nupa in khat ka zangh uh hi.
USA inn photos
Ka Zi in Aksa Company ah nasem a, ka tapa Dalsen in ka inn-nai mahmah, KOBEE Company ah nasem hi. A lutphet in Naikhat $15 tawh kipan pah a kum sim-in $1 ta, kum 10 dong akhangna Company ah na hongsem hi. A nasep na zong gimluat om-loh na khat hongngah hi. Ka Mo-nu Ciangseen in zong inn-nai mahmah na Company khat-ah nasep hoih mahmah, gimluat omlo na khatmah ah hong ngah hi.
Neampi in zong a inn gei-ah nasep gimluat lo na khat-ah nasep hoih mahmah khat hongngah hi. Keipen Zomi Agape Church ah Pasian naa kasem a, thupha tampitak kasang hi. Ka khasum ban-ah lovegift kangah den mai hi. Ka Pu ka Pa te sang naleng inzong, thupha sangzaw ding-in ka ki-um hi. Mi tampi kahuh khia hi. Kawlgam ah ka ciah October- November 2018 kum in Thein 70 kiim , melthei tanau te bek hi lo in mi tampi tak ka huh hi. Kawlgam pan hongpai, Pasian nasem mi tampi tak zong Lovegift $1,000, $500, $200, $100, $50, $40’dongin ka pia hi.
America gam sung, state tuamtuam pan gupkhiatna Tintan piading in hong sam kawikawi uh a Lovegift zong a tultul in ka ngah hi.
photo
Photo
Leitung ah mihau pen te-i, nuntak na naleng a eng nonlo zah dongin Topa thupha ka sang uh hi. America gam ah a tung Sizang mi-te lak pan in piakkhiat na ah a nih na hiding in ka ki-um hi. ( Hi bang kacih ciangin innkuan sungbek unau sung lianbek a en-te lo sungpan kacih na a hihi )
America ah ka Zi tawh AnsaiPi te-ah ka utsial un kapai uh a An kaneden uh hi. Puansil niikteen kadeih peuhpeuh uh kalei mai uh hi. Innsung ah duh bangbang An huanding Pasian-in hongpia hi. Niangtui dawnzawh lo in Pasian in innsung ah hong koisak hi. Nek sathau le bawngnawi pen tuizat in Topa in hongzangh sak hi. Pawlpi mi-te in Anpal hongpiaden uh a, Lovegift hongpia denmawk uh hi.
Nidang Kawlgam sung ka-om lai-in Dollar ka mu-ngei mahmah kei a, America pan ahih leh Topa in nisim in dollar ka innkuan in hongzangh sak ziahziah ta-mai hi. Nidang Kawlgam ka om-lai in PHA KAN ah Pasian nasem te ka eng mahmah ngei a, Pasian in America ka tun khit ciang-in tua PHA KAN tawh akiteh thei-lo thupha aZah tampi in hong-pia hi.
Ka innsung ah khua adam leh heater kahong a, khua alum leh Aircons ka hong hi. King size tungah Pasian in honglum sak a, ka tawldam mahmah hi. kum 65 kaphak ( 2019 ) ciangin ka zunthum hangin ka tha hongbei in Kalup na leh ka Anbuuk naleng katawl
ta-mai hi.
Kawlgam khawng a, aomlai bang himawk leng Zunthum neilai. thabei lai, Annek ding ki lungkham mahmah laiding cih ka ngaisut ciang America bel nuam na lawmlawm ve ee ka ci-ci mai a, ka cidam lo semsem Topa tungah ka lungdam semsem, ka lungkim semsem a mai hi. Annek tuidawn ding peuhmah Pasian in hong lungkham sak non lo ahih man-in vanh-zan na lakpan vawh-zan na lian pen in kangaisut ta hi.
Ka Zi leh ka tapa leh ka Monu in zong nasem uh a, a khasum uh hong hoih mahmah uh hi. Kei KU TAI in zong Pawlpi pan in khasum kasang a, tuaban ah Pawlpi mi, inn 100 kiim bang tawh om dimdem kahihman in ka lungmuang mahmah a, ka lungsim zong a lian mahmah hi. Topa aw nuam na lawmlawm ve ee nong ompih na, ka ciden mai hi.
photo
Ka Zi in zong puansil niikteen hauh cihtak in hau-in Kawlgam sung i-om laitawh kikhai na lawm lawm hong ci thapai hi. Ta numei, a nungta 3 leh ta pasal khat kaneih uh lak pan ka tanu a Uupen Syamah Lamhno losiah America ah ka tunggai uh a, ka innkuan, ka innkuan un Pasian in thupha hongpia kim hi. Kawlgam ah a om ka tanu Lamhno zong B.Sc zo in kumpi sang Syamah sem in a pasal tawh a te-te 3 tawh Topa in, inn-nuam, lo-nuam pia-in TA HAN .khua ah teeng uh hi.
Nidang in Kawlgam ah ka Pasian nasep lai ( 1977-2009 ) hun-sung ka-pawl ka-lawm te ka bat-lo honkhat hong om hi. America katun ciangin Pasian in nidang a ka-pawl ka-lawm te, ka-een mahmah ngei khempeuh sangin ka hauzawkei zongin hong engsak peuhmah nonlo hi. Innlehlo, neihsa Mawtaw te akipan Pawlpi dongin kuamah kuamah hong eeng sak non-lo hi.
photo
Pasian in hong ompih a, America gam Pawlpi khangto pen khatah A MA naa hongsem sak hi. Maipha zong nasia tak-in hongpia hi. Kateen na uh Bowling Green City ah Kawlgam pawlpi 19 om-a, Tua lak-ah alianpen pawlpi ah a Naa hongsemsak hi. Ka mai-a, atai ka khan-gual khempeuh hong phasak kik hi. Pawlkhat bang-i, mai naleng-ah hong tai sak kik hi. Pasian in kei tungleh ka innkuan sungah hong angvan napen lamdang in Pasian tung-ah ka lungdam na kamtawh kagen zo kei hi. Topa in ka tanu ka tapa te, ka maak te ka Mo te ka tuu te dongin tuni ciangciang thupha hongpiak sak hi. Topa tungah ka lungdam na kalak na in keimah hong tap ka tuu te min a nuai a bangin ka phuak hi.
1. Kap Thian Sang ( Pasian hang in kadin mun sang kasak na )
2. Kap Thian Thang ( Pasian hangin minthang ka kisak na )
3. Kap Thian Hon ( Pasian in galkap thukan te khut sungpan
Police te khut sungpan, hahsak genthei
na pan honghot khiat den ka lungdam na )
Kanuntak na-ah Pasian lo peuhmah tawh ka lawhcin zawk-loh na tel-lua kahih man-in THIAN kihel lo, Min ka phuakngam kei hi.
Topa Pathian awng lungdam lalawm ing. Nong kithua pui na.