6. AI ZAWL AH SALOM AG PAWLPI A PIAN NA

Kei pen February 16, 1996 kum in Bangalore, India pan in Master of Divinity ( M.Div ) ka man hi. Ka M.Div mankhit ciang Delhi ( India ) ah tawlkhat ka om hi. Tuakhitciang AIZAWL ah kazin kik a, Rev.Lal Zara  AG Pastor pa inn mah ah zin katung hi.

Nikhat keikia ka om laitak in Tang.Pau Kel ( Anlangh khuami ) leh Pa Cin Sawm Pau ( Phaileng mi ) a nih un honghawh uh hi. Tualeh amau bang honggen hiam cih leh “Koh Sum abeiding khempeuh hongzong nung in, nangh Gupkhiat na thu Tintan Aizawl ah hongpia in hong ci uh hi. kei zong hi hen Ooo thungen ni kaci pah hi. Tuahun pen AUGUST 1996 kum pawl a hihi. A mau- in zong Gupkhiat na Camp bawl nading in Sum hong zong kawikawi uh a, pailehciah Mawtaw saapding, Bible Camp sungah Annek tuidawn ding, Gupkhiat na Tintan piak nading innsaap ding akipan akisamding sumkhempeuh hong vaihawm uh hi.

Tuakhitteh Dul Hlang Bible camp bawlna innpi ah OCTOBER 17-20, 1996 kum in Ni 3 sung Gupkhiat na Tintan, Sya Zel Thiau tawh kapia uh hi. PaSian Kha Siangtho in nasiatak in naa hongsem a, Tintan hongkah khempeuh phial in Gupngah hong kitel uh hi. Tetci hong pang ziahziah mawk uh hi. Tua ka Tintanpiak ka mankhit uh ciang Aizawl ah kaciah kik uh hi.

 

Photo

Tua Ka Tintan piak laitak lian mahin ZBA ten zong Aizawl ZBA biakinn mah ah Gupkhiat na TIN TAN a bawl uh hi.

Tualeh Sunday Ni hongtun ciangin ZBA makai te in tutung in ZBA makai na tawh i biakinn ah Gupkhiat na Tintan ki bawl thei a lungdam huai mahmah hi. Gupngah kitelteng in Tetci panna hong nei un acihleh Khat zong dinglo. Tualeh DUL HLANG Bible Camp ah  Keimah ( Rev.Thang Za Kãp ) i Gupkhiatna Tintan ah hongkah te in Rev.Thang Za Kap in gupkhiat na Tintan hongpiak a, Gupngah ka kitel uh hi cih Tetci pah ziahziah hihtuak uh hi.

Tualeh Pa Cin Za Khup ( Tungzang Khuami ) Pa Thawng Pau ( Tungzang khuami ) Pa Tun Khan Pau ( tu in Australia ) te honkhat kitom in Rev.Thang Za Kãp pen Sihzang mi hi ci in Minam tawh kopi in hong ko uh hituak hi. Tua thupiang khempeuh keitungton in Gupkhiat na a sang teng in nasa mahmah uh a, honggenkik uh hi.

Sia aw AIZAWL ah Pawlpi khat nongphuh kei leh ka kilhop theih nading uh biakinn om nonlo hi hong ci uh hi. Keizong ka lungsim sungah mawk aw ee, Keilah Mizo pau,  Annek tuidawn nakhop ciangbek pauthei ing a, tuaban ah Pawlpi dinzawk nading sumtha paaitha la neilo ing a, biakinnsaap nadingdong a sumkisam ding hilai a, koici peuhmah mawk ding kahiam ci in kabuai phamahmah hi.

Tuabangin ka om laitak in Nitak khat, Pa Pau Sing ( Heilei khuami ) leh Pa Khual ( Heilei khuami, USA ) honghawh uh a, I UPMAWH SA IN I NAU SUAK BAIH ZAW EI hong ci uh hi. A cihnop na uh pen i upmawh sang in Pawlpi thakkhat hongpiangbaih zaw ei a cih na uh a hihi. Topa in khentat na ( making decision ) pen keitung lian ah hongkoih ta hi. Ken kakhentat leh AIZAWL khuapi ah AG pawlpi piangding a, ken kakhentat ngamkei leh AIZAWL khuapi ah AG Pawlpi pen a piang zo ngeinon lo ding dinmun a hihi.

Ahangpen AIZAWL khuapi ah kei-i tun maa in Tang Sing Tuang ( Vangteh khuami ) in ZOMI AG Pawlpi na phutkhin a, beikik hi. Tuakhit ciang Tang Thang Pian Khup ( Tungzang khuami ) in a nih veina AG pawlpi naphuh leuleu a, nabei kik leuleu hi. Tuakhit ciang Sia Thang Khan Thawn ( Suangpi khuami ) in AIZAWL khuapi mah ah AG pawlpi na peuh leuleu a na bei kik leuleu hi. Tua ahihman in kuamah in AIZAWL khuapi ah Zomi AG Pawlpi peuhmah piang zo dingin lamen ngam non lo uh hi. Tua ban-ah a lang lam-ah ZBA Pawlpi te  thahat mahmah uh hi.

Keipen Zomi AG pawlpi apianzawk loh ding sangin AIZAWL khuapi ah khanton in teen sawmngiat lo kahihman in AG pawlpi phuh ding himhim kasawm kei-a,  ka-ut kei hi. Vaisah kasalua hi. Ahihhang ZBA Pawlpi Upa te Sia te i hongko gawpna teng hangin kei tungton in a Piangthak teng kikhop nading omnonlo mawk ahihna tawh utleng utkeileng AIZAWL khuapi ah Zomi AG pawlpi phuh loh in hongphamawh ta  hi.

Pasian in lah, AI ZAWL khuapi ah Zomi AG pawlpi phuhding phuhlo ding kei i khentat nabek hong ngak ta hi. Ka khentat Ni zan in mittang khat zong ka si kei hi. Zan thapaai in zan kahat a ka ihmu thei kei hi. Zingsang khuavak teh ka khentat ta hi.

Tua ka khentat khit teh LAI kabawl leuleu a, tua Lai AIZAWL khuasung ah Zo Mi ka muh khempeuh uh ka pia kawikawi uh hi. Tua Lai sungah  bangbang hi leh November 17, 1996 Ni in AIZAWL khuasung ah Zomi AG pawlpi kipan ding hi ing. A kuamahpeuh hong kikhawm un by.Rev.Thang Za Kap ci in lai kahawm khia hi.

Tua kahawm khiatkhit ciang Sunday Ni biakpiak na kikhop nang in biakinn zat-nang, ka zon kawikawi a, hong hamsa peuhmah mawk hi. Biakpiak nading biakinn ka ngah zawh lo teh ka zin tunna Mizo biakinn, Rev.Lal Zara kiang ah a mau kikhop khit ciang biakinn hong zatsak nang ka nget leh hong pia in a mau kikhop khit uh Nitak Nai 1:00pm pan biakpiak na bawl thei nang in phal na ka ngah ta hi.

AI ZAWL KHUA PI AH SALOM AG PAWLPI A MASA PEN BIAKPIAK NI
Aizawl khuapi ah  Zomi AG min tawh biakpiak na amasa pen  November 17, 1996 kum a hihi. Pawlpi min zong Zomi AG mah ka cipah uh hi ( ZAG ) Ahihhang AG bulpi lam te-in Minam min bulphuh in Pawlpi min zanghtheilo ding hongcih uh teh SALAOM AG ci-in kinung khel kik hi.

Photo Aizawl Preaching

Photo

Tua Ni in hongkikhawm mi 180 ka phapah uh hi. Biakpiak na kipatmaa in biakinn nuai teng hong gamlum mahmah uh a, pusuak in ka et leh Aizawl Zomi Baptist church pan khangno honkhat in Zomi AG pawlpi ah hong kikhawm dingte lampi pan napang uh a, hong pai teitei te tawh biakinn nuai ah na kipumlai uh hi. Mizo Upa te naleng in hong huh uh a, kabuai mahmah uh hi.

Kei zong Lai kagelh  pah a, mai Nipi Ni ciang nong buaisak kiklaiding uh leh Mizo Police te kasam ding hi cih lai Zomi Baptist khangno te ka pia hi. Amau in kong buaisak nonkei ding uh hi hong ci hi. Tuahunlai in hongbuaisak khangno te lak ah kamagilh theilo pen BE NA akici Suangpi khuami ( Capt Sing Khaw Khai nau pa) te pawl a hihi. A mah pen RC pawlpi hi a, Aizawl a om sungin a ki Tuiphum sak mahmah khat a hihi.

AI ZAWL ah SALOM AG PAWLPI ( Zomi AG Pawlpi ) pen Pasian in thupha hongpia in Pawlpi mi kibehlap ziahziah hi. Biakpiak napen ki gamlum lua mahmah denkeei ahihman in, inn nei ( land lord ) te leh   venglehpaam in hongthuak zolo in, muntampi ah kituahtuah hong kul hi. Tu in bel Rev.Lal No makaih natawh biakinn ding building that 4 khat lei uh a, nuamtak in suaktak tak in biakpiak na neithei ta uh hi.

Rev.Lal Zara te biakinn pan kapaikhiat uh teh kabiakinn saapna uh ah tupphah ding omlo ahihman in Pawlpi mi akuamapeuh in tutphah bawlnading sumlepaai hongpia ngei ngai uh a, tuatawh kabawl uh hi. Tuni dong in kamitkha ah ka mulai hi. Tua tutphah te LIAN TEE ( Hakha mi ) tawh Aizawl khuasung ah ka nawn kawikawi uh hi. ( Lian tee pen tu in Rev.Dr.Liantee hi ta a Kalaymyo ah English speaking leh grammar a hilh pa a hihi ).  Kei zong Rev.Lal Zara te kiang pan ka zinkhel in Pian-a ( Tang Thang Pian Khup, Aizawl Police, Tungzang khuami, Rev.Kappu nau pa ) tawh KHAT LA KAWN ah inn kasaap khawm uh hi. Tang Pian-a in kakisap khempeuh honghuh hi. Pawlpi vai ahzong tampi honghuh hi.

Aizawl SALOM AG pawlpi Upa pawlkhat in Aizawl, SALOM AG Pawlpi apian nading in Rev.Thang Za Kãp in hong huh hi ci mawk mawk uh hi. Tua bel a zuau uh a hihi. Pasian in kei hongzangh in Aizawl ah Zomi AG pawlpi aphut hi a, amau honghuh uh a hi zaw hi. Kagensa mah bangin tuahunlai in Zomi AG pawlpi 3 vei kiphuhkhin a, a thum vei in beikik ahihman in kuaman phutngam nonlo phutzo nonlo uh hi. Aizawl Zomi AG pawlpi or Salaom AG pawlpi apian nadingin Pasian in keimah Rev.Thang Za Kãp hongzangh ngiat ka hihi. Pasian in khentat na ( making decision ) hongnget laitak in hamsa kasa lua mahmah a zankhat sitset ka ihmu peuhmah kei hi. Tua thu pen Pasian leh keibek in tuni dongin a thei ka hi uh hi.